انريدو جولة .. علي وطن هاللي عندهم فالطولة .. مضايقين نلقنا

انريدو طله .. علي وطن هادي جوبته منحله .. خلاء قعدته تبري اطناشر عله .. فيه ما خيال يتوق ترعي زولة .. بعيد عالحياة القاسية الممله .. بين خلق ما عاد الوفاء يرعولة .. عايشين ع الغله وسب المله .. مشو في طريق مظلمه مجولة .. يغصو بالإبره ويزمطو فالخلّه .. محللين ما حرم الله ورسولة .. حياة باسلة فيها معرم كله .. الياس والشقاء لجمامها متلولة

انريدو زيارة .. لوطن ماانداس امفيت مالخوارة .. فيه رافقت الاريل هميل القارة .. اللي زولها خايل امرافق زولة .. يزوم وسطها هااللي ثلاث افطارة .. وعند طلقها دلقمت منتولة .. شفاق سمس في مغرب لها نحمارة .. وعاد الرغاوي دايرات اسيولة .. يزق في انياب تقول باب مغارة .. عليها برم داشع اخطاه عجولة .. عليه حشوها عرمس ولم اعشارة .. وطاح وانحطز طيحة اللي مقتولة .. يدحنس وتمن ضايقات حضارة .. امحول غلالة في حطب نرعولة .. مشى جلها عدت جيوش نصارة .. كراديس يدعكن احتلن دولة .. خطرها إلا عقلي وضيق مدارة .. وسرحة أفكارة في ابرور الغولة

انريدو ياما .. وياما تكيد الشرح والفهامة .. عليها انحطو مالاعراب علامة .. مرة وتمشي للعرب مجهولة .. الحاصل غمامة نهلبو لغمامة .. وجولة كدر تهلب تجينا جولة .. لمعيشة اقسام وكل حد بأقسامة .. وكلا قسامينا احنا ميكولة .. كيف من حرث بالدين بدري عاما .. وصابة نبت زرعة ودار اسبولة .. اوين طاب فارح به وجو لمامة .. رغاطة حصد زرعة وهم فرحولة .. وصبح الدراس اصبح وغاب ظلامة .. وكوم مالرماد اصبح لقي محصولة