يا جميل اوصفه .. اجمام خاطري منك امعبى كافه .. جميل وسوايا

يا جميل اهذوبه .. كاف خاطري خليت دوبك دوبه .. امعبى سوايا لين مي محسوبه .. وحتى جمايل واجدات ورافه .. مشوش مواجهته اليوم صعوبه .. في فهم ماصاير وثاق اكتافه .. وتمت احقوقه كلها مسلوبه .. حاكمه غلاك وفقدته واريافه .. وكمّين نوبه تتّليها نوبه .. وعلوه رياحك كسرت مجذافه .. قاطب غلاء جاير زمان اشبوبه .. مرباعه يكيد الوصف والوصّافه .. معاك ياللي تحلف سبيب لعوبه .. غثيثك امنضد فالحزام تلافى .. نسيمه يزكّم في الخشوم اهبوبه .. ومادرت في بالي حساب اصيافه .. في يوم بين الصبح بين اغروبه .. يصير الفراق تهوني وتعافه .. انقولو اقسام وكلها مكتوبه .. ايبات كل حد يشلا بنار اولافه .. منيحه غلاي اصبحت منهوبه .. وهذاك الغلا كله قعد خرافه .. وتمشي وماتمشي الا بذنوبه .. غلانا اللي بيدك كربت لحافه .. ولكن اللي صارت وفي غيبوبه .. الخاطر بعدها منزوي يتهافه .. خبر جايني منك نقول اكذوبه .. لين واكده جتني وجت الإضافه .. منك سوايا واجده مصبوبه .. وهذي نهتني في ربك خافه .. امسمي عليا ليش مي مطلوبه .. رزيت خاطري ودوبه ابدي يتعافى .. نلقها شهاده يامنقرش ثوبه .. وبوهذب واجد ع الخدود تكافه .. وبوعين سوده واسعه ورغوبه .. امعانا افعالك منتهى السخافه

كان نشدت !!

كان نشدت واتريد العلام .. ابخير امغير مانا طيبين .. اسماها غير عيشه والسلام .. شبه اموات موش امدفنين .. نهار تعيس متقفي ظلام .. ارقود تقول لكن واعيين .. العقل يجول يجبد في كلام .. له مدات في جوفي دفين .. تمام نقول
لكن مو تمام .. حالي دوم للي ناشدين .. لغير الله مشكانا حرام .. وعيب وصغر قدام الاخرين .. وحق الله يا وجوه الكرام .. عندي عقل حاله تم شين .. يريد يجول يبرم في اوهام .. منحجرات عنه لهن اسنين .. الله الله لله الدوام .. وين اقعدن وانا اليوم وين .. اوهام اسياد لربد بولجام .. عريض الصدر وقصير القين .. بو جرجار لمسلّم سلام .. جميل الوصف لمّد كل زين .. اللي ع القلب يمسح فالغمام .. عليه تخاف عين الحاسدين .. اسياد النيب واسياد الغلام .. بالزروق هاللي واسمين .. اسماح النزل عاليين المقام .. عدادين قاب اللافيين .. ودك دوم يبقولك احزام .. ضرابين في حاحب العين .. كسارين لخشوم الخصام .. عدادين لوم اللايمين .. بنايين مكروب الكمام .. وسيع الجال وافي عشرتين .. بوجه بشوش وبطيبه انغام .. يلاقو الضيف بيه مرحبين .. الحق معاه له سيف وخزام .. ع الظلّام واللي عابثين .. فكاكين حق اللي انضام .. بشرع الله والا باليدين..

لبلاد رايحة وسط ديموم

لبلاد رايحة وسط ديموم .. كونها انباعت انباعت .. ابدي رايها فيد فقوم .. فلاس شين والناس جاعت .. اللي ما اندم بات متهوم .. الغافله البارح استاعت .. اليوم تطّحن قوم في قوم .. واللي ماجلت جوع جاعت .. والجاليه مشت وسط برّوم .. هوان راضيه بيه طاعت .. يغيثها الله اصدور مرسوم .. وشوره يقولو ادّاعت .. زعيم صادره موش متهوم .. بخونه مع ناس ضاعت .. اتبات عامره وكل مذموم .. جزاء ينال مو نعت ناعت .. يبات حبسها اجمام مزموم .. من ناس ظالمة ابليس طاعت..

جميله تقبل في جميل .. امنين اتشيل .. امعايا هذب اغزار طويل

جميلة فالوصف وفاللون

وكبر اعيون
اتقول امشرطهن مجنون

وسالف بدّد ع الضبون
حرير طويل
مع لفتتها لين اتميل

ومضحكها ياناس حنون

امعاه اتخيل
الضحكة تبري كم عليل

نوارين فصدري مكيون
ان هف الليل
اتخايل للعقل اتخاييل

ان ماتاقت يبقى بلهون
العقل ايسيل
افكار اتجيب افكار اتشيل

راك انتا الغالي .. مكانك فوق ما يسواك والي .. وحق الله

راك انت غلايا .. يا مشكاي يا مالك دوايا .. مكانك فوق عالي في سمايا .. وزهاي معاك و وجودك دلالي .. رمشت عين تغييبك جناية .. عن لنظار يا مهدّي مجالي .. معاك انهيم كي تجبد رواية .. كي الصغير نسرح في خيالي .. روحي رحت عارف م البداية .. ريحة صقر في لفّة أتوالي .. وحق الله طيفك ياغلايا .. وين انغفل نوقظ به ايشالي .. ساكن في خلاهن اشلايا .. منتثرات في عشقك الخالي..

ولي امرنا هو اللي نهار اغيابه .. .. سواء الوطن حالة تم هو والغابة

موش "عقيله"
ولا  الذيل  "بوسهمين"   شين    الحيله .. ولاهو "الثني" ولا "اغويل"عاقب جيله .. ولانا    مع    "السراج"    بيض    اشنابة .. ولانا     مع    "الضوال"     في     حبّيله .. ولي   أمرنا     "لنقّر"     جميل    وجابة .. ولا   "كوبلر"    و"ليون"    فيه    وسيله .. اتلم    بينا      لا      انمذرحو      لجنابة .. "سيرا"    اللي    عاود     ورافع     ذيله .. يحساب   وطنا    تمّا   رخيص    اترابة .. ولانا     مع     "جمعة"     ولاو      بديله .. حتى         ردّلنا          علي          دبّابة .. ولانا    امعاه   "العور"   عاقب     جيله .. اللي  القبر  مو  حاسب  نهار   احسابة .. ولانا   مع    اللي    خان    حار    دليلة .. اللي   باع   وطنه  وباع   عز  أصحابة..

انشدني نحكي..

انشدني نحكي ع الفرسان
اللي للناتو ما طاعو

اللي صبوله في الميدان
علي سامر نار اداعو

اللي ما منهم والي خان
اللي للخيان اصدو

اللي ما تاهو ف الطوفان
اللي ما بالهانه رضيو

انخبر ع الماضي اللي كان
وع الحاضر هاللي لاتو

اللي فازع للوطن ايبان
اللي م الرافال انبادو

بعثمان علي بوغيضان
وخالد بوضية نحكو

وعيت الزروق الشجعان
اللي حقك يادار عطو

ثلاثة ما فيهم جبان
الروس افداء عزك هانو

لهم صيت وعزة ومكان
علي حرمة ما ايتعدو

احماة للخايف والجيعان
اللي ما ع الضيف ايمنو

ضنا جوضر نار ودخان
اسماح الفزعة وين ايجو

اللي ما ضيهم ما ينهان
اللي به ع الغير تعلو

معمر لحسون الشجعان
وصفهم والخاين صدّو

امكتف بتلول الخرطان
اول مدعك فيه تنادو

عليهم دارو كم بيان
ايبوه فناهم لو طالو

ولكّي الفال يابات العنود .. ان شاء الله بعد بن نايل اتعود

ان شاء اترد طيب
ياللي الوطن في اغيابك ايشيب .. حاله     شين    ندعولك    اقريّب .. ايجيك   افراج    وتقود   الأسود .. كيف  زمان  في  العظمى اتهيّب .. الله       كريم      كسّار      القيود

ان شاء الله اترد سالم
يا  مغوار     تكسر     كل     ظالم .. عهدك    تم    حلم     لكل    حالم .. مسجونين    من     غير    القيود .. حيل  الشعب   تم   لهم   امسالم .. اذيول   الغرب    واتباع    اليهود

يا ليبيا العظيمة .. عليك الزهاء والفرح والتبسيمة .. غياب وينهن

وين غابن عنك
وخير حالتك هكي انظر كيفنّك
زعم في ضناك اليوم خايب ضنّك
وضنك عليك بتنجلي هالغيمة
وضنك ارياح النصر بيزورنّك
بعد هالشقاء كله وهالتغتيمة

قالت:
رايد ربي
انطيح ياعلي وان راد تو انصبي
ريت هول واجد خاطري متعبي
مامن ظليمة تابعة لظليمة
وريت خير واجد ما انريد انخبي
نحمد الله نشكر افضاله ديمة

قلت:
ريتي واجد
عارفك ومن ينشد جوابك ياجد
ومامن عدو جيشة عليك تراجد
يا العالية في الشان يا الكريمة
ومامن اللي خايب وعاود ساجد
جاك يعتذر راكع لسمحة القيمة
ونا زاد حتى انا شقاي تواجد
تمّا علي الفرح غايب ديمة

قالت:
كنّك حاير
وكنّك امغيهب متخذ شن صاير
وعليك ليش كنهن ضايقات حضاير
وانتا قبل كاين للثماير سيمة
الا اليوم متشاوم وفكرك طاير
وانت قبل ماعمرك ارضيت هزيمة

رد على "رزح با ثقاله في لاوهام .. ضلاله رام .. تعلّل بالوطن المنظام

الشاعرة وهج الجنوب تقول:

رزح با ثقاله في لاوهام
ضلاله رام
تعلّل بالوطن المنظام

‫#‏مشاركتي_تقول‬:
رزح بااثقالة واصلب
اليوم اغلب
اكبر همّة جاء مدّلعب

اللي كان زمان ايشرهب
ابروحه هام
امصنقر يغفر في لوهام

احواله ما والي تعجّب
ان جاء الظلام
ايجن جور امواقيه اجمام

وجيعه واستعصت ع الطّب
جضيضة دام
خبر لاهو يوم ولا عام

سبايبها بو دور انكب
عرام عرام
تكاصى لين هلب لحزام

اللي خزر اعيونه يكّلب
لذي انغام
كلامة ما قاله كلّام

شهادة وابها انتحاسب

خذيت ايام
امعاه اليوم يساوي عام

رزح بأحمولة..

في رائعه جديدة من روائع الشاعر/ "سعد بورجعة" يقول : ( يابو ثلاث حكايم .. ماعاد حالك تتّقيه عزايم .. يا وطنا ) عجبني شاركت عليه ومشيت شوي

#مشاركتي_تقول:
يا بو ثلاث عصايب .. وما اهناك لا سراق عنهن غايب .. بعد ربيع دالنّك اسنين جدايب .. ف عزّنا وفي عزّك الله الديم .. مصايب وجونا جايبين مصايب .. لبّاست البدالي طوحو العمايم .. كتايب اتحارب في اجيوش كتايب .. ما يفرق السكّار ع اللي صايم .. اليوم كل حد فازع وموسه طايب .. سواء الفعل ما ظني اتفيد ندايم .. افعالهم سواسي تابعين درايب .. وصعبت العيشة فيك ما اتلايم .. علي احمولنا زادو احمول صلايب .. اليوم م الفلس ما عد اتصيد عزايم .. دلال عشت ياحضرة جناب النايب .. كل يوم في فندق اتبذر هايم .. وكل يوم في دولة الراي الصايب .. عليه ما اتجي لانك عليه املايم .. الله لا اتربح من خرابك جايب .. يا وطن عنهم في خلاك رمايم..