رد مني على أبيات لاحدى الصديقات

 تقول في أبياتها:     

الدنيا تبي وسعة بال..
وتبي راجل للمعلومة..
تريد نسا مش قولت قال..
تفزع عدادات اللومة..
تبي اللي راخي الاحبال..
ولا يحسب فاللي مذمومة..
تبي اللي عقله شيال ..
للزينة وفعل المقيومة..
تبي اللي فالح عوال..
وماينزل لمنازل بومة..
تبي اللي مايهاب جبال..
ماتغراش مظاهر روما..
تبي اللي فالحق افعال..
لايركع لاينزل سومة..
تبي وتبيلك مازال..
تبي اللي فاهم من يومه..

ردي يقول:          

الدنيا تبي راجل زين

افعالة والقول امسقم

امربى تربايت زينين

يخاف الله فرضة قايم

وعارف كل اركان الدين

محافظ واللي خاف اسلم

يعد اللومة من لخرين

وما عمرا خاف ابنادم

رضي من ربي والولدين

عليه الميعاد امرسم 

الجار احقوقه يعرف زين

ايواصل مايقطع ف الدم

امنسب من ناس فراسين

ايطيحو دون امباديهم

نباهم يحكوبا لخرين

عرب ماوالي يقرضهم

عرب للجلها نزالين

ايخاطو فالعيب وفالذم

ابيوت علي عز مقارين

غنيمة للي جاورهم

عليه اتحوش ام حوارين

اتجلي ف الياس وف الهم

ضناهم شجعان فراسين

افدا الوطن ايبيعو في الدم

ركوبة تفرق عن لخرين

استوبار اكحيلي سالم

براريمة مافيهن شين

علوقه وافي وامجمم