حوار شعري بيني وبين صديقي سالم مفتاح الورفلي دزلي ابيات يسأل عني بعد غبت

يقول ::

وينك ياعلي ..... ليك ايام غايبهن علي ..... ان شاء الله خير

وينك ياعقارب ..... يلي القل دوم معاك طارب ..... المانع خير والله الضي هارب ..... والله الجيب مالباره اخلي ..... والله غير كثرنلك مسارب ..... دابك دوب بوسالف اروي..

رديت ::
قاعد يااسلومة .. وسط الحوش كابي كي البومة .. راني هنا

قاعد يارفيقي ..... ياطفاي لهمومي وحريقي ..... بعيد عليك نكمى فيه ضيقي ..... انعاني في متعرم قوي ..... بختي شين نشف لين ريقي ..... ومسع قص نا عندي الضي ..... وحتى ان درت غالي ياصديقي ..... ماننساك هذا طبع في..

قاعد ياالغالي ..... بختي شين يقطع في اوصالي ..... كيف زمان راني كيف تالي ..... كي ماكنت ماغيرت شي ..... ان قتلك هبل تستغرب اهبالي ..... وعقلي زين نعرف كل شي ..... ان قتلك شيخ مايصدقش والي ..... ننشد دوم وين العقل في..

رد ::
ايعدلها العالي ..... ايفرج هم وايجيب الغوالي ..... ايطفي نار رقيت للعلالي ..... ايروق الحال والغايب ايجي ..... لافي خير لاقي في خوالي ..... مشوا لصحاب وين جيبي افضي ..... شيخ الياس دوبه دوب حالي ..... عالمنظار ظربه ما اخطي ..... مجاور بوم في الغرده اسطاوي ..... حدا معيان مايصلي نبي ..... الحاصل حال حالي كي الجالي ..... خيط رجاه جي قطعه الثني..

رديت ::
ماكيفاش حد ..... الله كريم في عبادة يود ..... رب الكون عاطي دون رد ..... هو القدير خالق كل شي ..... امغير اسعدي ماعندي سعد ..... مابا يوم يرحمني اشوي ..... انعاني فيه ماعندي جهد ..... وياس امعاه بكتوفه قوي ..... ونا نبيه يبقالي سند  ..... خبيث بركن عين ايشوف في..