اتريدو شعر .. علي جيش متهضد بقادة قعر .. نا نعتذر ياللي

ياللي تبوني انقول..
علي  جيش  قاعد   موقفه   مجهول .. من    غيبة   زعيمه   جابره    مسلول .. اطياح   طاح  سومه  ما ابقيله  سعر .. ايردو       ايبانو      للعيان      افحول .. انقولولهم     درب     الشهامة      وعر .. ع اللي   حياته   عاش   بين   اعجول .. ايخلّه     امدنقر      مستواه       القعر..

يا طالبين اشعاري..
مازلت     عالمبدأ      صريح      قراري .. ومازال    ثابت    ما    رجح    معياري .. وانزالن   ادروبي  هن   ادروب  النعر .. ومازلت     ما    نمدح    الا     متواري .. والزعر   في  اموازيني   انزالو   زعر .. وكلاب حلف الاطلس ماخطتهم ناري .. اللي   حيلهم   خايف   انصاب   بذعر..

احكي ع الازمة والنواب .. وناس اعطاب .. كلو رزق ومواطن ساب

احكي ع الازمة والنايب
ومال انّهب
ومواطن حقه انسلب

ونازح قاعد متعذب
اظروف اصعاب
اوحل في تعشايه وشراب

احقوقه بين يدين اعطب
حشاك كلاب
مسارق وكّالين اتعاب

اجعنهم للنيران حطب
عليهم صاب
المولى كل شقاء وعذاب

وجع ما عد يلقوله طب
ولا طباب
وفي القبر ايذوقو العذاب

اجعن حالتهم بين كلب
وبين اعياب
اجعن ما يلقو راي صواب

عليهم جام العيب انصب
ان ما استجب
ادعايا نا يدعو شياب

اشرف وارحم متقى الحطب
وسف تراب
ولا قصر بذله ومعاب

شهادة حاله ما يعجب
اللاجي ساب
قعد بين ثعالب واذياب

عليهم كم عفن ايطلّب
نظر يذّاب
ولسِنه مبرومات ارطاب

وكمّن لجنه تستوعب
وكم اكتاب
بعد جاه المستخلص ذاب

اليوم في الغلا..

اليوم في الغلا بتت معتاز .. وايدي فوق خدي لطايم .. والعقل عند لولاف منحاز .. واخذينا ملك دايم .. القلوب ودها كيف القزاز .. ان كان انكسر ما يلايم .. ونا القلب جاء فيه لكّاز .. امقلل علي العزايم .. نصبح بعزم وايبات حزاز .. ع العين من اوجاع الهزايم .. ونمسى بدمع تيار ايتلاز .. علي اخدود والفكر هايم .. العقل دارهن لي مركاز .. لوهام غيرهن موش رايم..

راك ما اتجي في اقدامه .. اللي معاه باته جنب بات اسامه .. ما تقلده

ما تقلده في افعاله ..
ولا مشيته اللي ماتجي في اقباله .. هذاك معتصم الانقر قليل امثاله .. اللي كان داير للاعداء جثامه .. اللي ما اطري عمره بدور فساله .. غباوين لو كانن اطوال ايامه .. ما وطنا شاخو عليه انذاله .. قيادي صحيح ايسد غير كلامه .. اللي العين تزهى كي تشوف ارتاله .. اللي دار بحواسه فحلف اوباما .. اللي ماارضي خشت اصفوف عماله .. شامخ شموخ الفخر نال وسامه

عامل بلا راتب امزيف عيده .. يخمّم علي خلوة اجيوبه وايده

عيده زايف .. يمشي نهاره في صغاء وحسايف .. اليوم في السيوله ينتظر وامرايف .. المصبى علي شباك وتفرهيده .. لجيبه ايمد ايجيب كلايف .. اوراق بينهن شيكه فحال زهيده .. واصدارة ستايف م الفلوس ستايف .. احذاه حاطهن صراف بتبوجيده .. اتقولش علي حالة العامل رايف .. والا اتقولشي امخلص كبير عبيده .. يا انويرتي تمّا العامل عايف .. اظروف الحياة القاسية النكيده .. يخمم علي لقمة اعياله خايف .. مدفور من صغاء ليام شور هويده .. ويا من نجد هوزان يوم الطايف .. من جيش مسلم حاصرة ويريده .. انجد العامل وانت حالة شايف .. فلاس شين دايربه وحال شديده .. وقبل كان موش أجير تمّا نايف .. شريك كان يملك والحياة سعيده .. انهاس فيه تمو حايسين سرايف .. الوطن والمواطن مرّطو بجريده..

عامل بلا راتب امزيف عيده .. يخمّم علي خلوة اجيوبه وايده

عيده زايف .. 

يمشي نهاره في صغاء وحسايف .. اليوم في السيوله ينتظر وامرايف .. المصبى علي شباك وتفرهيده .. لجيبه ايمد ايجيب كلايف .. اوراق بينهن شيكه فحال زهيده .. واصدارة ستايف م الفلوس ستايف .. احذاه حاطهن صراف بتبوجيده .. اتقولش علي حالة العامل رايف .. والا اتقولشي امخلص كبير عبيده .. يا انويرتي تمّا العامل عايف .. اظروف الحياة القاسية النكيده .. يخمم علي لقمة اعياله خايف .. مدفور من صغاء ليام شور هويده .. ويا من نجد هوزان يوم الطايف .. من جيش مسلم حاصرة ويريده .. انجد العامل وانت حالة شايف .. فلاس شين دايربه وحال شديده .. وقبل كان موش أجير تمّا نايف .. شريك كان يملك والحياة سعيده .. انهاس فيه تمو حايسين سرايف .. الوطن والمواطن مرّطو بجريده