اخلوقي ضاقن .. امواجع وضيقة علم في تلاقن .. مااهناك مانحكي

مااهناك بيش انخبر..

حال شين وقت اسود عطيب امغبر .. انجبر ايطيح وينكسر وانجبر .. غايب سعدهن مالشقاء يزاقن .. انظاري عليهن يلتفت متكبر .. جميع من لفن داره ومسع راقن..

مااهناك بيش انخرف..
قاعد ابروحي منزوي مطّرف .. بعيد ع العرب والدمع لين امجرّف .. الماقي انظاري للطرب يشتاقن .. ياس شين حايزني علي تعرّف .. طبق علي اخناقي ايديه اطباقن..

جبتي ضنا الأمين ع القومية .. زيدي فخر ياحاجة ‫"صفية‬"

جبتي ضنا الأمين .. صقور في الشدايد حق مشهورين .. ناري علي اللي ما عرفهم زين .. اللي طاح في حظن الصليب رمية .. بحروف من ذهب وألماس مكتوبين .. تاريخ ناصع غصب ع الحسدية .. وصيت ‫#‏معتصم‬ بالله ع الاخرين .. فارق فرق بشهادة اعاديّة .. بين الجباهي وبين لمّيادين .. مشهور بالشجاعة وفوقها غيرية .. شهادة علي ارقبتي ليوم الدين .. اغيابة اخسارة حق للقومية .. و ‫#‏سيف‬ طلعته تبقى علينا دين .. احنا وكل ثابت تشغله القضية .. و ‫#‏الساعدي‬ و ‫#‏هانيبال‬ محبوسين .. والعار في جبين الشرف والقومية..

حوار بيني وبين الشاعر/ باسط الطنطاني بتاريخ 16 _ 01 _ 2016

بعثتله وقلت :

وجيش القبايل ياك وضعه هاني .. ايش حالك وحال اعربك ياطنطاني

كيف اخبارك..
ياك غير مطامن وماسك دارك .. وياك الهبد ما حد منهم زارك .. ياخوي خبرني علي حباني .. الصيعان هاللي خاشين معارك .. ياك حالهم طيب بلا براني .. وجيش القبايل نازلينا اصدارك .. كيف حالته ننشد وليش امواني .. انريد شرح ياصاحب وفي انتظارك .. بالله سقد ما علي اتواني.. 

رد الطنطاني يقول:
خوتك بخير عليهم..
ثابتين مازالو علي مباديهم .. ولا الظلم لا الظُلّام يوصل فيهم .. سلم الله اولادهم صيعاني .. خوتك ستار طرابلس نطريهم .. في الغرب توقف ضد للعدواني .. وجيش القبايل ربنا يحميهم .. شباب ليبيا مايقبلو البراني .. عامين واكثر فارقو اهاليهم .. لاجل الثني والوطن يرجع ثاني .. جاهزين ما يقدر عدو يفنيهم .. احني بخير ياناشد علي حباني .. وتوا عليا الدور شوقي ليهم .. الحسون ياخوي القريب الداني .. ننشد علي لاحباب نبي نجيهم .. يابن عقارب عزوتي وخلّاني.. 

ردّي يقول:
لحسون هما هما.. 
قاعدين يرجو في زوال الغمة .. علي وطن متملح اغرق في دمة .. شعبه وقاعد فالهموم ايعاني .. قاعدين ع المبداء وفوق الهمّة .. سواء حالهم كي سرت ياطنطاني .. حكيم رايهم من قبل فوق القمة .. امهوطين يرجو والكلام معاني .. الغايب نهار ايبان يسهل ضمة .. من سرت للبريقة يكون فكره هاني .. خوتك ضنا جوضر اتجي ملتمة .. عليهم قبايل سرت في الميداني .. مية مرحبة تكرام من بز امة .. خوذ الكلام القند والعناني .. تفضل نسايم عطر وطني شمة .. اديارنا اديارك حوش بوك الثاني.. 

الطنطاني:
تريس عناد..
سوا ف سرت ولا صقور بن جواد .. الحسون ناسي وعزوتي الاجواد .. وكان للمحبه سطور هم عنواني .. منين في البريقه صاير الملهاد .. فراسين خلوه السفيه يعاني .. الله يصونهم من العين والحساد .. شهاده الا مرايف عليهم راني.. 

ردّي:
ما تستحق شكيرة.. 
الصيعان هم ناس الثناء والغيرة .. خشاشة النار الكابرة الكبيرة .. حزم عاصمتنا مالعدو والداني .. كمين ملطم حاظرين سعيرة .. التركي مع النيتو مع الطلياني .. الوطن انكسر واحنا اليوم جبيرة .. لمو بعضكم زين ياحباني .. حيا الله هلنا طيبين السيرة .. وصل سلامي حار ياطنطاني.. 

قريب ايصير في وطني نهار

قريب ايصير في وطني نهار .. ايجلي اهموم تو امكدسات .. نهار كبير مسع قبل صار .. فيه اجيوش يلفن زاحفات .. فيهن صقر قايدهن اجهار .. شديد العزم بخطى ثابتات .. كيف السيل يكنس فالاوكار .. اوكار الدنس يمسن ناظفات .. ويزهى الوطن يبدا فالعمار .. اديار العز يبقن عامرات .. يمسح دمع يذرف مالكبار .. علي غياب دمعة الامهات .. واللي خان يشعر بإنهيار .. اعصابه لين ماهن حاملات .. اذيول الغرب تشعر بإنحسار .. تهرب بين جو وباخرات .. شرق وغرب يلهب لهب نار .. وجنوب اوسط هن لي باديات .. ايعم امان وايردن اقدار .. بين الناس ينسو لولات .. وايرد امجاد وايردن افخار .. وحتى ارزاق كانن رايحات .. وترجع ناس برا مالديار .. جوالي تو راحو ف الشتات .. لو تنجيم لو حلم وافسار .. امواير تو فيه امقابلات .. بعون الله سو الوطن طار .. الصبر الصبر وادعو بالثبات .. عقارب قال وانا في انتظار .. اشارة الامر ماللي غايبات..

ما انزايدو ع الرجاجيل..

ما انزايدو ع الرجاجيل .. ولا انطيحو قدر والي .. ياللي اتزايدو ياسفاتيل .. افداء الوطن نعطو الغالي .. احنا يوم رزم الثقيل .. شهير صيتنا في المعالي .. ياللي اتفاخرو بالبراطيل .. ولبس الختم والبدالي .. ياللي رزقكم هيل مو كيل .. ايام الرخاء ولبس الجبالير .. اوين صار قفع وتزلزيل .. كراهب ضناكم إمّالي .. واليوم وينهم فأين رحيل .. اهربو وين صار المشالي .. انهم ايصورو ف الفناجيل .. هذا انضالهم مو نضالي .. وانهم ايشفطو ف المراقيل .. ضوال فعلهم ما ايوالي .. وانتم اتقطفو يا تماثيل .. شيلو عليا اقوالي .. جميع من هرب يا هذاميل .. كيف من امجابه ايشالي .. خيان كلهم ف التحاليل .. امفيت قل قل القلالي .. وانتو انتمذرحو القال والقيل .. راس مالكم يا حصالي .. امنين سيدها ايجيب ويشيل .. كساب الحنن والمتالي .. ما يقربه امفيت القليل .. وغاب ما اقمح ذل عالي .. اليوم شعبنا عاش تهويل .. وضاق لذع صهد القبالي.. 

الوطن انباع والنفط انحرق .. وحال الشعب للسيء فرق

الوطن انباع بيع .. جاه خريف وايقولو ربيع .. كان زمان ياسع في الجميع .. وتم اليوم متقسم افرق .. حالة صعب كي حال الرضيع .. العين اتشوف وايده ما اطق .. الشعب انساق كي سوق القطيع .. حشاء الاحرار واللي ما سرق .. فيه الموت بالشكل الفضيع .. عذاب وخطف باعيونه ايحق .. الوطن انباع هان .. وتم الشعب راضي بالهوان .. ايلجي غير مو لاقي مكان .. ميت غير عايش ع الورق .. غني بالنفط متريح زمان .. وقدرة فوق ياكل م العرق .. إلا هالوقت دخانه ايبان .. إحرق بالنار نفطه وانسرق .. اغرق للحلق يبحث ع الامان .. ضاع اضياع في روحه اشرق.. 

خلهم ايضوقو خلهم .. ادعاء م الشيوخ وم الايتام وهلهم .. اذيول الاعداء

خلهم ايشوفو رايهم .. وخلهم اينايو كان ينفع نايهم .. يمهل ولا يهمل المولى جايهم .. عذابه اللي قتل البري طابلهم.. 

خلهم ايضوقو مره .. تتبيعهم حلف الصليب وجره .. اللي في احداش الفين ردو كره .. امنين صغقو لروما اخباث نسلهم .. وخلهم ايلفو هدمهم في صره .. وخلهم ايعدو وين ما طابلهم .. وخلهم ايباتو ف الفيافي بره .. كيف ما احنا بتنا ايام جهلهم .. قلنالهم هالشي فيه مضره .. ولكن طمعهم للهلاك اوصلهم.. 

خلهم ايشوفو زين .. لين يعرفو هم وين واحنا وين .. احنا بالشرف والعز مشهورين .. وهم فعلهم في المزبلة راكلهم .. امعاهم اتعاني في العذاب اسنين .. ليبيا وما نوم الهناء طابلهم .. بين الدول شذاذ مكروهين .. حتى قليل الشرف موقابلهم .. افعالهم تخطت حد حد الشين .. وهذا جزاهم من اجناس عملهم .. اخسارة مشت هيبة الليبيين .. امنينهم ايودو والعصر قاتلهم .. ايام بالكرم والجود معروفين .. اياماً بساط الخير مفروشلهم .. الا اليوم راحو دوس بالكرعين .. ياالله من وحل الاذلال انشلهم..