احترنا ف اللي كان ودود .. وبان حقود علي ماضية ايريد ايعود

احترنا في اللي ع الشاشات .. ايبانوا من برا الحدود .. اللي لبستهم ع الموضات .. ايخبوا وفيه اللي بجرود .. اللي يحكوا ع المليارات .. وعن مال امجمد مفقود .. الهم ماعد صدنا غايات .. انياهم مكروهات وسود .. ايسبوا ومرات ومرات .. ايحيوا في فرعة هبود .. انياهم لنا مكشوفات .. اقبالة ما فيها مجحود .. الخافي خبث وحب الذات .. اللي باين جاويد وجود .. اقلال الحيلة والرايات .. كلامي مايحتاج اشهود .. ايحايوا في ماضيهم مات .. وماضينا بالعز ابنود .. جرو ع الفتنة لكن هات .. التاريخ امسجل موجود .. بعد تمن ليدين خوات .. اموحدهن فارس جلمود .. زعيم ردم كم عداوات .. قعد لا سيد لا مسيود .. بعد دالنا طيارات .. الغازي دون الوطن ارجود .. اصابينا مات اللي مات .. وعاش اللي عايش مضهود .. الذيلي ذيلي في الساحات .. اتبع درب اسلافه الحقود .. اليوم بعد عدة عامات .. نقض لعهود .. قرض فارس علّا لقرود

احترنا ف اللي كان ودود .. وبان حقود .. علي ماضية ايريد ايعود

الله الله يا دار اليوم .. جباك امشوم .. ايشيب فاللي مومفطوم

الله الله يا دار غلاي .. وفيك امناي .. سعتا كنتي حد زهاي

اليوم انجيك ونا بكاي .. علي اهموم .. ارماهن بو سالف مبروم

اللي كاين دايا ودواي .. غلاه اسهوم .. تواكن ف القلب المزعوم

قعد لا عد شيرة لا راي .. اوجاعة كوم .. وتشميتت حسادي كوم

امحطم متشظي تشظاي .. رقيق اعزوم .. قتيل إلا ماهو مردوم

انجيك بعد حوزة مشكاي .. علي الزوم .. انسكب نا وانتي والبوم

الله الله يا دار اليوم .. جباك امشوم .. ايشيب فاللي مومفطوم

الله الله يا دار اعزاز .. بعد كنتي للعين ونس

اليوم احجر ريدي منحاز .. تباعد وافكاري حوّس

ايام وهو كفّي مركاز .. الغالي ما غيره وآنس

سعتا وين الحن اعتاز .. عطيته بأسعار أمبخّس

انريد ايكافيني ارتكاز .. جنين غلاي عليه ايعس

ايصبي وايكافي بإنجاز .. الياسات ايقوللهن حس

إلا بو خد اتقول قزاز .. علي اهموم .. ارماهن وأفراقه امحتوم

الله الله يا دار اليوم .. جباك امشوم .. ايشيب فاللي مومفطوم

يخزر!! موش امبحّت فيكم .. حط عليكم .. لوم وقال الله يهديكم

يخزر مايبي شوفتكم
من سيتكم
هاللي جابتها ثورتكم

واجعته منكم سيتكم
بإيحييكم
فرصة جبتوا مُحتليكم

دونك هاهي روما جتكم
وين دويكم
وتو للتصفيق ايديكم

الخمسة الناقة عارفه قيمتها .. سيد السبيب بغيبته عافتها

الخمسة عافت
بعد عز خمس اسنين قهرة شافت .. جميع الوذيلة ع البلاد تهافت .. نوت ابساط وبنتها شالتها .. حملت الا واجد اقهار وزافت .. بلاد للهلاك امعدية اعرفتها .. عافت احطوط الصورة .. علي افلوسة قيمتهن اصفار اكسورة .. ابهن قبل كانت فارحة وفخورة .. ايام سوقها حامي علي خمستها .. لها اسنين من غيبة زعيم الثورة .. حازنه عليه وشاينة شبحتها .. فينا اتبهت شوفت المنحورة .. ماعد اتشرف ع الورق قعدتها..

وإن كان عدتوا عدنا .. احنا الوطن مابعناه لا حلبدنا .. امعاه مرحبا

اتردوا انردوا..
شهير صيتنا من قبل مانجدوا .. انوتو العدة والعتاد انعدوا .. وتاريخ هلنا لولي مجّدنا .. ارجالنا علي سامر النار ايهدوا .. لا ايكبكبوا لا ايطالبو بالهدنا .. لا في قهاوي مصر يورو مدّوا .. ولا من اطري منهم خذل قايدنا .. وانزلنا علي ثاره السرج انشدوا .. وانزال حسبة خو لنا وولدنا .. لا نعتدوا ع الجار لا انتعدوا .. علي خوتنا ماننطروا جرّدنا .. ايام طاليا ما من مسامي عدّوا .. وانشد اجبيل امنين جاه ولدنا .. وانشد الزنتاني امنين اصدوا .. اعداء صف لكن وطنا وحدنا .. وانشد الكفرة كانّا ب أنعدوا .. بينا معارك قايدين وقدّنا .. وجيت الناتو استشهدو ماردّوا .. ما من ارجال امصنعين فقدنا .. ما ابها انمنوا!! ناخذوا وانودّوا .. اللي ايودنا وع الجاردين جردنا .. واحنا اطبول الحرب وين انكدوا .. ايدقن اطبول اصفوفنا وسندنا .. واللي يستفزوا لا مشوا لا ردوا .. ايبروا انفسهم قبل قولة ردنا

وين "الاس" يابشار؟ .. وإلا نظامك منتهي وانهار! .. عليش داسهن

وين الإس اربع مية؟ .. خشو علي دمشق صهيونية .. "القنطار" راح بطايرة حربية .. الله وعلم موفيدك ابقي القرار .. وحتى ولد الأمين ع القومية .. عرين الأسد في وسطه انباع اجهار .. لشلة اقلال الشرف والبيتية .. فيهم عشمنا بان جتهم نار .. العقبه لأبولحية وبو طاقية .. الخاين حسن صفاق الإستعمار .. الله يجعلة بين الأنقاض رمية .. متفتفت اشلاء صاعب على الدوار .. واللهِ ادعاء مالحاجة صفية .. وقبله انشد شن صار في الثوار..

حوس العين مجالها .. ودردر جواجيها وعطب حالها .. اغياب معتصم

اغياب الدامي..
يا عازته ساعة السوق الحامي .. اللي في لهاليبها ايجي متعامي .. وهي نار حمرة كابرة ما سالها .. بنغازي انهاست بنتها جاء رامي .. امنين هندبت تبكي اتريد ارجالها .. فيه انكسرنا وفي تريس مسامي .. والرجال ما تقعد امغير افعالها .. يانا اللي نارهم وناره كامي .. الانقر اللي عوز بلاد بحالها..

احنا لا بعنا دار العز

احنا لا بعنا دار العز .. ولانا للخيان سند .. احنا قلنا للناتو طز .. ايام اللي خان ايمجرد .. احنا عركتنا ما تنحز .. الثأر اثنين ثلاث ايرد .. احسون النا تاريخ اكرز .. ولدنا ما عمره حلبد .. ولا عاقلنا ايتنرفز .. كلامة بأفعال اموكد .. الضيف ان جانا مايلتز .. ولا جار النا ايتهدد .. وصاحبنا شاهين ركز .. افعاله والراي امرزرز..

اليوم طواري .. مدردر علي فرقا اسماح الطاري .. مالصبح خاطري عالن

طواري عالن .. 
امطلع غصايص غير ما ينقالن .. علايل ايجني مالعرب يتالن .. ونزمط امطوح ع التبون مذاري .. وشايل احمول اثقال ما ينشالن .. وصابر انتبع في كلام اكباري .. امكالي وجايع قهر ما ايتكالن .. وكاضم علي غيضي بعزم انداري..

عالن رسمي .. 
متكدر ويطافر تغيظ باسمي .. ايحرض علي ايريد نعلن حسمي .. ونا الوقت صيف بالاوجاع اخضاري .. جايب محاور جاي ناوي وسمي .. بعزيلة الكدر والياس موش امواري..

لو عندنا هيبة صحيح ودولة

لو عندنا هيبة صحيح ودولة .. واللي حاكمين ارجال موش انذال .. ما راه ينهانو اصحاب الطولة .. ولا بو العنود شروه مالصومال .. ولا راه حالتنا اليوم خجولة .. ولا انباع في دمشق هانيبال .. ولا عن بعضها ليبيا معزولة .. ولا كل حد يعزف علي موال ..  ولا رزقها رايح وهم يرعولة .. ضناها عليهم شايخين ضوال .. ولا بنتها بين العرب مذلولة .. ادور في الشوارع حالها موحال .. ولا في المدارس سايبة امهمولة .. الناس قاصرة ماعد اطول اوكال

مشاركة على راس بيت للشعر اسمه القومية العربي بشان التحالف السعودي او ماسمي بالتحالف الاسلامي

يقول الشاعر:
"افرح يا خاين جاك الخير .. بلحلف كبير .. وروسه من فوق خنازير"

‫#‏مشاركتي_عليه_تقول‬
افرح ياخاين وافرح زين .. بحلف متين
وروسة من فوق اشياطين
اليوم فراحة ملتمين .. اعطب تفكير
ايقولو والطيار ايطير
الوجهة ماهيش فلسطين .. يبي تدمير
الشام وصنعا ضني غير
بعد غيبة بات السيفين .. حشاك حمير
ايقودن في الامة واتسير
ارمونا في اذيول وداوين .. لهم تقدير
اسوا مالسيء فالتحكير
اليوم هنايا مرتاحين .. اقلال الخير
اللي ايريدوه ايصير ايصير
انهو الاقصى في شوف العين .. عليه ايغير
الصهيوني والشعب اسير
اينادي فيهم لكن وين .. حديد ذكير
ايريد مع زم بنادير
امتى عمر العصمليين .. جنو تقدير
ايجابي وإلا الخنازير
فطايسهم مالسوريين .. وصالح خير
اترضي وجه الله الكبير
انذال وموشاغلهم دين .. امفيت سكير
وكبسة واموال بعاثير
الحكمة ما تبي تبيين .. الحق شهير
وع الباطل دار تباهير
"افرح يا خاين جاك الخير .. بلحلف كبير .. وروسه من فوق خنازير"

يا "فادية" ماخير درتي فينا .. ضربتي العزيزي كف ودرتينا

ما درتيش خير .. بلاد العرب مدّمرة تدمير .. جراير الكف اللي صداه خطير .. ما من الزين اللي بلاه ابقينا .. والله لو عندك اجرام ضمير .. ما اليد مديتي وضيعتينا .. عليك كف كيماوي مداه كبير .. امحرم استخدامه وبيه اغزينا .. مع الجسمي هاللي نباه شهير .. فرقت نبا هتلر وهول اسنينا .. في قلب تل ابيب موش فغير .. الغاية لكم يبنو اقصور ثمينا

ماعد اهناك حكومة .. ولا اهناك حاجة صالحة مقيومة .. بلاد دامرة

ماعد اهناك حكايم .. بلاد رايحة يخلف الله الدايم .. اليوم كل حد في حال روحه هايم .. والشعب حاير رادته امهزومة .. ارضي بالقليل وطاع دار عزايم .. ايريد خير مطّاول صعيب اقدومة .. ألقيه راي عاقبته شقا وهزايم .. إيلجّي قعد حاير وطاير نومة .. رايم وما غير الندامة رايم .. اللي مااقتل لاجي هرب مالحومة .. واكل ايديه بحسرته وندايم .. الراي حرف مونافع من اول يومة .. القدر طاح في موجة الفوضى عايم .. اليوم المعادي بث فيه اسمومة .. العز ضاع والهيبة بلاها نايم .. وانهارت مسيرة بالفخر مرسومة..

خذا غايته فينا حسن نصرالله .. ايدور الزمان الدين يخلص كله

خذا غايته في ارجالنا .. اموكلين مولانا عليم بحالنا .. مامن اللي غيرة بسية طالنا .. عارف العظمى خايضة منحله .. انسي فزعته ساعة النيتو دالنا .. فزع للصليب اعداه دين ومله .. صيورنا انردوهن ايام دلالنا .. يجي كيف غيرة منقلب في سله .. غباوين لو دارها ايام ضلالنا .. ما ايبات بيها يوم والله والله..

بعد يومين من اغلاق قناة الجماهيرية

اغيابك شين .. حتى كان ما اتردي المدفونين .. علي ابيوتنا واعر
اغيابك قاسي..
واعر وزايد ع الهموم مأسي
نهار فقدتك فاقد جميع حواسي
يا جايبة طربنا والطرب من وين

اغيابك مر..
واعر اليوم احساب 100 شهر
علي شاشتك يخطر الطير الحر
وتخطر اوجوه اعزاز وامحبين

اغيابك صاعب..
من يوم ضلّمتي وعقلي تاعب
مامن عزوز ادموعها تزّاعب
وكانن عليك ايكبنن تكبين

اغيابك حار..
يااللي اتمثلي جملة ضنا الأحرار
اللي اصمدو ضد الحلف والكفار
اللي بالكرم والجود مشهورين

المصرف اليوم امسكرات ابوابة

المصرف اليوم امسكرات ابوابة .. والكوشة اتنوض الفجر للطابور .. والشيل زحمة والعباد رغابة .. اتشوفهم اتروح منكمد مغصور .. ولمية اللي كانت اتجي منسابة .. اتشوف الشوارع غارقات ابحور .. مدعاها ابقي مدعى يثير غرابة .. اليوم بيهرها تما ايجم ايغور .. ومنهل العلم اليوم من طلابة .. خالي مدارس نصها امهجور .. والطالب اللي يقرأ ايجيب اكتابة .. قديم شاحته من جار به مسرور .. ومو امغير هاب ا هابتين وهابا .. تدفع الرشوة لو تبي بسبور .. وخلك الجالي عاد من يشقابة .. حال العدو وين الزمان ايجور .. مدعاه شين ياناري ايجيب كأبة .. بين القرايب متخذ وايدور .. بعد كان في حوشة امسكر بابة .. حتى ومو امخوج حالته مستور .. وحالة اعديك حالة البوابة .. ما هو غريب ايفتشك مخمور .. اتشد الطريق وحالتك مرتابة .. اتخمم اتخاف اطيح في امحظور .. الجاهل ايصغر قرم عالي قابة  .. وحشاكم! الصايع منصبه مشهور..

قريب سيف عالشاشة اسا تارنا .. يعلن بيان الحرب غير ارجنا

قريب ايبان
ويطلع على الشاشة ايقول بيان .. لا ايهمنا في اللي عميل وخان .. ولا في مغرر بيه تو وكنّا .. لمو بعضكم واتركو الاحزان .. را الوطن ضايع يااعباد انهنّا .. شدو بنادقدكم فكل مكان .. صلاح ليبيا محطوط نصب اعينّا .. طلع فسرت في طبرق سوا الزنتان .. حال ليبيا يبي تريس امعنّا .. انسو الضغاين والسلاح إيمان .. شرف ليبيا وام الغثيث احزنّا .. انداس عرضكم جمله بلا حسبان .. ما من خبر خافي وما انطقنّا .. والله العشم فينا ايبان ايبان .. الله اكبر م الجميع ومنّا..

عليك كواين

عليك كواين

حديث شين موخافي امقابل باين .. ما يمتسح بلكل اسنين ملاين .. ان قلت عار بسّطته وما صورت .. مدردر ملاج العقل وقته حاين .. اخسرت ارجال صاح اخسرت .. علي ما اطري فالوطن وجهك شاين .. ما بعدك ياقلبي ان ما انفجرت .. مهازل ايكرن جايبات غباين .. يا وطن لرجالك اقبور حفرت .. الدايم الله فيهم اليوم مداين .. انهانن بعدهم ع الاوجاع اصبرت .. قليل الاصل فيهن والردي والخاين .. والضال واخذ غايتة انقهرت .. حياة زايدة تمت امغير مهاين .. يااعوين من اقتل ضد الصليب فسرت..

غاب الزهاء ياوطن كنت اترندي .. من دون الاوطان اليوم طالع بندي

كاين راسم..
امنين سرت هي مصدر الراي الحاسم .. وخيرك علي لخرين منه قاسم .. امنين والسلاح امفيت فيد الجندي .. ايام وانت بإشبورك افخارك واسم .. إلا اليوم وضعك منقلب مزبندي .. اياماً وفالدولة اهناك مراسم .. وان فتت الحدود اتقول فايت فندي .. اياماً ونا رايق طريقي راسم .. نحمد الله ارضيت باللي عندي .. ايام وضناك ايهيجو بمكاسم .. عقاب الشعوب اتقول نا شن عندي .. ما احسبت يدّبا حمد بن جاسم .. اجوانا وهو شرطي بلاده هندي .. لفطح اللي خشمة اتقول مناسم .. هضوم العرب خوتي اخوايت قنّدي..

عليك عين منهلعة اتقول اغرارة .. اتقول شرّكوها شاربين سكارة

عين كبيرة..
أشر من اسلاح ايران في تدميرة .. جميع من ايصادفها ايطيح ضريرة .. اتقول في ادماغة قاصفة طيارة .. ياعون من تحوّاها امعاه سريرة .. وين يلتفت يطرب اتروق انظارة .. اتجيه بالحلال امنقرشة في حيرة .. ايبات وينما توصل مشارف دارة .. اللي خدها يشكع ايلج بهيرة .. شفاق شمس في موسم ربيع منارة .. وشفه ومبسم والشعر له عيرة .. تخضب نزل غمرين قيس اعبارة .. وحاجب بلا رسام لا كوفيرة .. مع رقصته ما من اعباد حيارة..

الشاعر علي الكيلاني يوجه رسالة إلى سيف الاسلام أسماها "كن والظلام إلى سيف الإسلام"

‫#‏مشاركة_مني‬
شد العزم ياسيف الاسلام .. كي ماكنت ديمة ياحنون .. ايزول الظلم يجلّى ظلام .. والكانون ما بعده ايكون .. موكي قبل ياسمح الابسام .. حقيقة موش ظن ولا اظنون .. بعون الله ماايمسك اعدام .. قريب ايجيك متقعد العون .. ع اللي خان ماينفع ملام .. الميت حي ديمة ماايهون .. سيد النيب خشاش الزحام .. اغيابة غير عن شبح العيون .. كي ما بيه عادك بالتمام .. صاحب فكر عامربه الكون .. قبل العام يقشع ضيم عام .. يبزغ فجر وايلجن اسنون..

الوطن اللي يرجى ف الخير .. ايبي لآسير .. وبوزيد امعاه المدير

الوطن اللي فيه ايراجي .. الخير ايبي
اللي ف التصنيف ارهابي

وجيش امدرب ع الروسي .. اسلاح خطير
شديد إصابة والتدمير

وقايد ف التخطيط قوي .. بعزم ايسير
اسبوع ويعلن ع التحرير

ايحييه الشعب الليبي .. اسياد الضير
بتاريخ الجهاد شهير

اللي جلّى حكم المربي .. سمو لامير
اللي دز لروما تقرير

ايام الظلم والايطالي .. وكم ضرير
اقتل مالعازة والتقهير

املوك علي عرش الفاضي .. براي الغير
ايسرو ماجابو تبرير

ياصاحبي في الصبح ريت ولية .. الله وعلم ماتطلع الا حورية

ريت غزالة..
معاها مشى عقلي وضل ضلالة ..  لها عين تربي صايبة قتالة .. امعاي شيعتها وارتزيت رزية .. رجت الخاطر وانشقم نعدالة .. نهلوس ابها تميت للطرقية .. حديث مااتجيب امعاه قولة لالة .. ولا تفيد توبة لا اتجيب لوية .. امعاي وسط عقلي راسخة فخيالة .. امعاها سرح ماعد اتجيب رجيّة .. اطوال ع المواقي هذبها نسدالة .. تعكف ابدال الهذب نبّت مية..