نشكيبة لمن.. جرح عزيز جور فـ الحنن.. كيف اندير

نمـــــشــــي بـــــيه ويــــــــــن ..... وكـــيف اندير للقـــلب الــحـزيـن ..... من لــولاف هـ اللـــي راخيــــين  ..... انلج اتـــقول راكـب فــــي جـــن ..... خــــــذيـــت ايام نا والغاليـــــين ..... دلال اوود متـــــخلــط بــحــــــن ..... غـــير اليــــوم ويــــنة راح ويـــن ..... زعــــم ياعـــين بدلـــــنا بـمـــن ..... انظـــــر فـــرحــان والا زاريــــــن ..... علـــيه اوحـود مافيـــهم الــحـن ..... والا راه بــــيه امـــــــدورديــــــن ..... اقلال الخــير شينـــين اللــسن..

ويــن لمـــــــــن انبـــــوحـــــــة ..... جـــرح اعــزاز كاينـــتا بروحـــــة ..... امعاه العقل مـو صايد امـــيوحة ..... ايلــــــج بـــنار وايامـــة لـــــوّن ..... لا اللي طال مالغالي سموحة ..... ولا هـو طاب واجـروحــة بـــرن..

الأجواد

لجواد ناس عصارة ..... ولجواد مايرضو نهار العيب ..... لجواد ياجاهل اصحاب كبارة ..... لجواد مسع صفقو لصليب ..... لجواد مارضيو نهار صغارة ..... ولجواد مايوطو امواطي عيب ..... ولجواد ماخشو الخايف دارة ..... ولا وسموها والعطيب عطيب ..... ولجواد من نزل فيهن اينال كبارة ..... اديارهم وما ياكل إلا الخصيب ..... ولجواد ماتقاوو ع الضعيف جهارة ..... ولا اغنمو رزقة والزمان صعيب ..... ولجواد فيهم كان تبي مارة ..... انجيبلكـ وياما فيه هـ السريب ..... احنا هل الجود اصحابها الكبارة ..... بخشم البنادق جايبين النيب ..... واحنا اسيادها واحنا لها المنارة ..... ان كلا الشجاعة كي اتريد اتجيب ..... واحنا للعصر منزل احنا موكارة ..... احنا اولاد جوضر يا كبير العيب ..... احنا ضد روما دايرينا مدارة ..... نحكيلكـ علي بالجرم والصاحيب ..... واللي هضا عارف زين زين اقدارة ..... رفيقكـ الباهي فيه وقت ايخيب ..... وحتى اللي بلهون موش اخسارة ..... تقديرتة اتعلي قدر سيد النيب..

انقول مرحبا للي نشد عن حالي .. واللي مانشد ماني امدور والي

انرحب بيهم ..... اللي ينشدو والله ونكبر بيهم ..... واللي يكربو نكرب العز عليهم ..... الله حي مانطلب جدا من والي ..... اشر من اكفايتهم اكفاي يجيهم ..... قاعد علي مبداي قبل وتالي..

انقول مراحب ..... للي نشد صاحب سو موصاحب ..... واللي مانشد والوجه فيا شاحب ..... لا انعبرة لا انجيه شاني عالي ..... ننشد انكان ذهبت واللي ذاهب ..... اندلة لدرب الصايبة طوالي..

انقول ايش حالهم ..... وننشد علي اللي جايني مرسالهم ..... واللي ايكابرو في غيهبان ظلالهم ..... خلهم وخليني امريح بالي ..... لعند يصافن محايس بالهم ..... ونا دوم ضامن مربحي في التالي..

مشاركة مني على راس بيت نزلة صديق يقول.. "ياموانسه عالدوج يالغديده ... مدي خفافك في اوطان بعيده"

مشاركتي تقول :

مدّي مدّي ..... ياأم الخفاف امدورمات وعدي ..... لوطن العفا خشي وفيه انهدي ..... وعيشي انتي والريم ياالوديدة ..... هناكـ موكاركـ ومنزل جدي ..... عليهن أعيون الحاسدين بعيدة ..... هالوقت يامينا عطيب ايردي ..... امعيشتكـ عطيبة ناقصة وزهيدة ..... دايريلكـ راعي خزوق امصدي ..... ياخذ عقاب الشهر راتب فيدة ..... مايشغلة حالكـ اووين ايودي ..... مسكر عليكـ بتل ياالعنيدة ..... وعيل ايجول عليكـ دوب ايهدي ..... امسكر قزازة جاي بـ كريسيدة..

مدي اخطاكـ ..... يا امديرة صاعب اردود اكفاكـ ..... يا امشومة مامن ارقاب افداكـ ..... راحن عقاب الليل وان هويدة ..... وكمّين مدعكـ صار في سباكـ ..... وكمّين غزي جاكـ وراح هو وقليدة ..... وكم شيخ عدا لحقكـ واعداكـ ..... دالوه خونة والديار بعيدة ..... وكم نجع عامربكـ وحس ضناكـ ..... داير زنين احذاه عاجب سيدة ..... الا اليوم حالكـ ما يسر اعداكـ ..... ولا يسر سيدكـ غير شي مافيدة..

ﻻ نتبعو البرلمان ..... ﻻ مؤتمر ﻻ حكومة ..... وﻻ نتبعو لحزب اﻹخوان ..... ﻻ لـ جيش حفتر وقومة ..... وﻻ نأيدو فيه زيدان  ..... ﻻ الكيب بياع قومة ..... وﻻ نهتفو تحت خلجان ..... وفرنسيس وجيوش روما ..... وﻻ نشكرو في امريكان ..... ﻻ حلف عاتي هجومة ..... علي وطنا هد بنيان ..... ودمّر اركان الحكومة ..... وﻻ نسمعو قول خرْفان ..... بو عين بيضة عدومة ..... هـ اللي فتن بين الأوطان ..... وبين المدن قل سومة ..... كبير قدرنا عندنا شان ..... وقت الرخاء والخصومة ..... ما نقبضو في أثمان ..... بيع وطنا فوق سومة ..... فداه ترخص الروح تنهان ..... انضحو بها يوم شومة ..... وما اندوسو حرم حيشان ..... جلو اسيادهن مـ المشومة ..... لا انفتشو هدم نسوان ..... كيف من رخص عند قومة ..... لا انروعو انسان مطمان ..... ولا نوسمو دار نومة ..... بها فيت ع النيب والضان ..... ماغيرهن شي وسومة ..... ولا نسرقو مال مُهان ..... كي من حسبها غنومة ..... اجواد هلي نااحسون فرسان ..... مشاهير يوم اللطومة ..... ايجو فوق من حمر عرقان ..... فراق وسط الزحومة ..... عابدين لـ الله الرحمن ..... اللي الليل نور انجومة ..... واللي خالق الإنس والجان ..... اللي يشوف في كل حومة..

فيه صديقة ضافتني بنتعرف بيها قالتي حسب علمي مافيه احسون عيت عقارب قتلها اسألي هلكـ وبعدين نتعرفو

وكتبتلها هـ الكلمات :
مانحكيلكـ امغير انشدي جدتكـ ..... اساع ترويلكـ .. امجاد ومفاخر هلي 

نا ماانقول شي ..... عندكـ هلكـ يحكولكـ علي ..... لمن من الناس يرجع منسبي ..... وما اتحيريش لا يذهب دليلكـ ..... اللي داروه ناسي مش اشوي  ..... افدا الحسون بيش ايعيش جيلكـ ..... حياة امجاد ينعم بالرقي  ..... خشمه فوق متعلي مثيلكـ ..... عقارب شيخ عايش كان بي ..... بين الناس مو جالي مثيلكـ ..... شهير الصيت وبدمة اروي  ..... اترب الوطن نوحي طول ليلكـ ..... علي طاريه بالصوت القوي ..... قجي الدمع واشلي طول ليلكـ..

مانحكي بصيرة ..... قليلة عرف مشكلتكـ كبيرة ..... عقارب صيت يحكو بيه غيرة ..... اليوم وراه خلا فخر لي ..... وين انجول البلاد الكبيرة ..... واجد ناس يحكو فيه لي ..... فارس عما مايهاب الذخيرة ..... وراية زين جبار وعتي ..... ايشق النار ما طاوع لغيرة ..... وفي العدوان ضرااب ورزي..

دخول حاملة الطائرت الفرانسية "شارل ديغول" للمياه الإقليمية الليبية

خطـرها علـي "ديقول" وأيام الـرخـاء
أيـامـاً وليـبـيا عايــــــشة فـ دلالــــها

وخـربت مــنازلــها وتشـريد النــــساء
وخـرابها اللـي من تحــت يـد اعـيالها

أيـامـاً وهـي لافوق فـي قلب السماء
تـعانـق عـنان المــجد همتهم ارجالها

وخطرها علي فرسان ساعات الوغاء
اللــي فـ وقتـهم ماعـمر والـي طالها

عليهم حـلال دمـوع واعــياط النساء
شــهور واجـدة واسنين طايل اجالها

وخطرها خراب الـوطن وغياب الهـناء
واللـي تاجرو بالـدم سـراقت اموالها

وخطـرها ضـنا الاجـواد جيابت الثـناء
اللـــي ركــعو رومـــا وجــرت أذيالـها

وخطرها اغياب الامن وغياب الـزهاء
وشوخت اللي كاينين تحت انعالـها

وخربت بيوت العـز واصـحاب الــعناء
اللـي قبـل ماعـمره ابنادم طالـــها

خطـرها علـي "ديقول"

خطـرها علـي "ديقول" وأيام الـرخـاء ..... أيـامـاً وليـبـيا عايــــــشة فـ دلالــــها ..... وخـربت مــنازلــها وتشـريد النــــساء ..... وخـرابها اللـي من تحــت يـد اعـيالها ..... أيـامـاً وهـي لافوق فـي قلب السماء ..... تـعانـق عـنان المــجد همتهم ارجالها ..... وخطرها علي فرسان ساعات الوغاء ..... اللــي فـ وقتـهم ماعـمر والـي طالها ..... عليهم حـلال دمـوع واعــياط النساء ..... شــهور واجـدة واسنين طايل اجالها ..... وخطرها خراب الـوطن وغياب الهـناء ..... واللـي تاجرو بالـدم سـراقت اموالها ..... وخطـرها ضـنا الاجـواد جيابت الثـناء ..... اللـــي ركــعو رومـــا وجــرت أذيالـها ..... وخطرها اغياب الامن وغياب الـزهاء ..... وشوخت اللي كاينين تحت انعالـها ..... وخربت بيوت العـز واصـحاب الــعناء ..... اللـي قبـل ماعـمره ابنادم طالـــها..