بمناسبة شهرقدوم رمضان

جانا جانا ..... شـهر الصـــيام ومــغفرة مــــــولانا ..... الـمولــى يقــدرنا بفـضل احـــسانا ..... ويقـبل الــطاعة والأعـمال الـزينـــة ..... ويهدي اللــي باعـد علـيه ايـمــــانا ..... ويرحـم اللـي غايب اليـوم علـــــينا ..... جميع من حضر قبل الصـيام امعانا ..... اللـي الروح غابت فـ المـنام ايجـينا ..... ويجعلــنا الله مـنــهم اللــي تـــوابا ..... ويمــسح ســوايانا بفـعل الزيــــنة ..... المــولــى كــريم ودوم فاتـح بابـــا ..... للـتايب اللـي كـاره افـعال الشـينا ..... والــخاطر ايـباركـ يا جمــيع احــبابا ..... مـــبروكـ الشــهر للــي ايعز علينا ..... ندعـو المــولـــى ونطلــبو الإجابة ..... ان شاء الله اتعيشوهن ايامه زينا..

حليـــبكـ ياام رقابـي عـــوج

حليـــبكـ ياام رقابـي عـــوج ..... قـــعد مـا عـاد ايريـدة حـــد ..... اليوم ايبـوه اللـي مـرجــوج ..... عصـير امـشكل مـا ينــــعد ..... وسيدكـ راكـب فـيه اولـــوج ..... ايجــي يعطـي برمـة وايـرد ..... ادماغة كيف اللي مرجـــوج ..... اخـسارة كان زمـان ســـــند ..... رفيقكـ بيكـ ايخـش افـــجوج ..... ايحامــيكـ ان جـاكـ الـــجارد ..... اليوم ايبي ببسـي مــبعوج ..... حــكاكيـة واللــــون اســود ..... ايدير وشيشة وسط الـدوج ..... وغـــــازة يـــــرقا يـــــسّارد ..... امراض وكي يبقى مرجوج ..... بســـالة دغـــري ايتــــبدد..

نوره !!

نوره ما حاجة خـسرتها ..... بلعانــي دارتلــــي رنّه ..... رديتلــها فـي لحـظتــها ..... ماردت لا قـالــت كـــنّه ..... يومـــين ورديت نسـتها ..... ردت ردّ بصــوت مـحنّه ..... هــدرزنا والـروح خذتـها ..... وانظاري دارنلـي غـنّه ..... من طبرق حتـى نبرتها ..... عقلـي قال انويها لنّــه ..... لو ما خوفـي تبلـيدتها ..... نركـب سـيارة انتــعنّه ..... ننزل فـي دار اقبالتـها ..... لين الناس ايقولو كنّه..

الخاطر رق أعزوم العين.. أريافه شين.. أيقوللها غيابي وين

الـخاطـر رق أعـزومـي نـا ..... 
أنهـال أبكـا ..... يـريـد عـرب مـي عـاد هـنـا 

اللـيل أمـقسـم شـيء أبكـا .....
وشـي حنـين ..... وعـبرة ومـعـاه تغـونــين

الخاطر رق أعزوم العين..  أريافه شين.. أيقوللها غيابي وين

الـخاطـر رق أعـزومـي رق .....
أمـعـاه الحـق .. الغـايـب مـاعـدشـي ينطق

قـعـد دونـه رقـراق أزرق .....
وحـالـي شـين .. بـلاه الفـرح أنشوف أمنين

الخاطر رق أعزوم العين..  أريافه شين.. أيقوللها غيابي وين

الـخاطـر رق العـزم وصـاف .....
طـواه أريـاف .. علـي فـرقـا طـيب الأوصـاف

أمهـول مـن غـادي رآيـاف .....
وزاد حـزيـن .. أمخـلـي حـال أنظاري شـين